#ExchangeStudent: ლილე ლიპარტელიანი | ELTE University

გაიცანით #IBSU-ს ინგლისური ფიილოლოგიის მე-4 კურსის სტუდენტი, ლილე ლიპარტელიანი, რომელიც Erasmus+ გაცვლითი პროგრამით ერთი სემესტრი სწავლას აგრძელებს ეოტვოშ ლორანდის უნივერსიტეტში, უნგრეთში, დაწყებითი და სკოლამდელი განათლების ფაკულტეტზე.

“ამ გაცვლით პროგრამაში მონაწილეობა ჩემი აკადემიური ცხოვრების ერთ-ერთ ყველაზე მდიდარ და ტრანსფორმაციულ გამოცდილებად იქცა. ახალ ქვეყანაში ცხოვრებამ და სწავლამ მომცა შესაძლებლობა, გამოვსულიყავი ჩემი კომფორტის ზონიდან, გამეცნო განსხვავებული საგანმანათლებლო სისტემა და გავცნობოდი ახალ კულტურულ პერსპექტივებს.

ELTE-ში არსებული განათლების პრაქტიკულ გამოცდილებაზე ორიენტირებული მიდგომა ჩემთვის განსაკუთრებით მნიშვნელოვანი აღმოჩნდა, რადგან ამან მომცა საშუალება მიღებული ცოდნა რეალურ საგანმანათლებლო გარემოში გამომეყენებინა. შედეგად, ჩემი პროფესია უფრო ფართო, გლობალური პერსპექტივიდან დავინახე და ვისწავლე თეორია და პრაქტიკა ერთმანეთს როგორ დავუკავშირო.

თავად ბუდაპეშტი შთაგონების ამოუწურავი წყაროა. ქალაქის ყოველი კუთხე ისტორიას მოგვითხრობს – მისი არქიტექტურა, კულტურული მემკვიდრეობა და უნიკალური ატმოსფერო იდეალურ გარემოს ქმნის არა მხოლოდ სწავლისთვის, არამედ პიროვნული განვითარებისათვისაც. ასევე მქონდა პრივილეგია, გამეცნო სხვადასხვა ქვეყნის სტუდენტები, გამეცვალა იდეები მათთან და დამემყარებინა ურთიერთობები, რომლებიც დარწმუნებული ვარ, პროგრამის დასრულების შემდეგაც გაგრძელდება.

გულწრფელ მადლობას ვუხდი საერთაშორისო შავი ზღვის უნივერსიტეტს (IBSU), საერთაშორისო ურთიერთობების დეპარტამენტს (IRD) და ჩემს ფაკულტეტს ამ გზაზე უწყვეტი მხარდაჭერისთვის. მათი ხელმძღვანელობისა და თანადგომის გარეშე შეუძლებელი იქნებოდა ღირსეულად წარმედგინა IBSU და საქართველო საზღვარგარეთ, როგორც ამ ღირებული გამოცდილების მონაწილეს.”