კონკურსი კვლევითი საქმიანობისთვის შიდა საუნივერსიტეტო დაფინანსების მოსაპოვებლად

📌შავი ზღვის საერთაშორისო უნივერსიტეტი აცხადებს კონკურსს კვლევითი საქმიანობისთვის შიდა საუნივერსიტეტო დაფინანსების მოსაპოვებლად; კონკურსის ფარგლებში ფინანსდება ფუნდამენტური, გამოყენებითი და აკადემიური საქმიანობის განვითარების ხელშემწყობი კვლევები;

📍შიდასაუნივერსიტეტო სამეცნიერო-კვლევითი გრანტების მიზანია უნივერსიტეტის სამეცნიერო-კვლევითი პოტენციალის განვითარება და პროდუქტიულობის გაზრდა, აკადემიური პერსონალის, ახალგაზრდა მკვლევარებისა და სტუდენტთა სამეცნიერო საქმიანობის სტიმულირება, წახალისება და მხარდაჭერა, ადგილობრივ და საერთაშორისო სამეცნიერო სივრცეში დაწესებულების აკადემიური პერსონალისა და სტუდენტების ინტეგრირების ხელშეწყობა;

შიდასაუნივერსიტეტო სამეცნიერო-კვლევითი გრანტების გაცემის პროცედურა:

ა) სამეცნიერო-კვლევითი პროექტი უნდა შეესაბამებოდეს უნივერსიტეტის ძირითად საგანმანათლებლო მიმართულებებს;

ბ) სამეცნიერო-კვლევითი პროექტი უნდა გამოქვეყნდეს უნივერსიტეტის სახელით;

გ) შიდასაუნივერსიტეტო დაფინანსებაზე სამეცნიერო-კვლევითი პროექტების საგრანტო განაცხადების შემოტანა შესაძლებელია ღია წესით გამოცხადებულ კონკურსზე, რომელიც გაიმართება წელიწადში ორჯერ;

დ)  საგრანტო განაცხადის წარდგენიდან კვლევის დასრულებამდე გრანტის ყველა მონაწილეზე ვრცელდება უნივერსიტეტის ეთიკისა და აკადემიური პატიოსნების სტანდარტები;

ე)   სამეცნიერო-კვლევითი საქმიანობისთვის დაფინანსების მოსაპოვებლად განაცხადის წარდგენა შესაძლებელია როგორც ინდივიდუალურად, ასევე ჯგუფურად;

ვ)   თუ დაფინანსების მაძიებელი მკვლევართა ჯგუფია, მაშინ კვლევითი პროექტის ხელმძღვანელი (მთავარი მკვლევარი) უნდა იყოს უნივერსიტეტთან აფილირებული აკადემიური პერსონალი (პროფესორი ან ასოცირებული პროფესორი);

📌 დაფინანსების მაძიებელი პასუხისმგებელია დადგენილ ვადებში პროექტის განხორციელებაზე, მიღებული დაფინანსების ხარჯვის მიზნობრიობაზე და პროექტის დასრულების შემდგომ დასკვნითი ანგარიშის წარმოდგენაზე;

დაფინანსების მაძიებელი პირი შეიძლება იყოს:

• უნივერსიტეტთან აფილირებული პერსონალი;
• უნივერსიტეტში არსებული კვლევითი ცენტრები (ხელმძღვანელები, თანამშრომლები და სტუდენტები); 
• დოქტორანტურის სტუდენტები;
• მაგისტრატურის სტუდენტები.

🖌️კვლევით პროექტზე გათვლილი ბიუჯეტი არ უნდა აღემატებოდეს 15 000 ლარს (საქართველოს კანონმდებლობით გათვალისწინებული გადასახადების ჩათვლით); 

🖌️კვლევითი პროექტის ავტორი(ებ)ს დარიცხული ჰონორარი არ უნდა აღემატებოდეს მაქსიმალური ბიუჯეტის 30%-ს;

🖌️დაფინანსების მაძიებლის ან, მკვლევართა ჯგუფის შემთხვევაში, პროექტის ხელმძღვანელის (მთავარი მკვლევარის) ჰონორარის არაუმეტეს 70% გაიცემა პროექტის განხორციელების პერიოდში, ხოლო დარჩენილი თანხა პროექტით გათვალისწინებული ყველა ვალდებულების შესრულების შემდეგ;

🖌️თითოეული სამეცნიერო-კვლევითი პროექტის შესრულების მაქსიმალურ ვადად განსაზღვრულია სამეცნიერო-კვლევითი პროექტის დაფინანსების დამტკიცებიდან მაქსიმუმ ორი წელი;

სამეცნიერო-კვლევითი გრანტების განხილვისა და გადაწყვეტილების მიღების ეტაპები:

1. საგრანტო კონკურსის გამოცხადება;
2. სამეცნიერო-კვლევითი პროექტების შემფასებელი საკონკურსო კომისიის ფორმირება;
3. საგრანტო განაცხადების მიღება;
4. საგრანტო განაცხადების განხილვა და შეფასება;
5. შემფასებელი კომისიის მიერ გადაწყვეტილების მიღება;
6. აპელაციის შემთხვევაში, სააპელაციო კომისიის შექმნა, პროექტების ხელახალი განხილვა და საბოლოო გადაწყვეტილების მიღება;
7. შედეგების გამოქვეყნება უნივერსიტეტის ვებგვერდზე;
8. სამეცნიერო-კვლევითი პროექტის დაფინანსების შესახებ ხელშეკრულების გაფორმება;
9. საგრანტო პროექტის დაფინანსება;
10. საგრანტო პროექტის განხორციელების მონიტორინგი.

საგრანტო პროექტის დაფინანსებისთვის წარმოსადგენი დოკუმენტაცია: 

საპროექტო განაცხადი უნდა მოიცავდეს:

ა)   განაცხადის ფორმას (დანართი #1);

ბ) სამეცნიერო-კვლევითი პროექტის შესახებ ინფორმაციას/აღწერას (მოკლე რეზიუმე ინგლისურად), ნათლად ჩამოყალიბებული მიზნების (რომელიც თავსებადია უნივერსიტეტის სტრატეგიულ მიზნებთან), ამოცანების, კვლევის შედეგების, კვლევითი საქმიანობის კომერციალიზაციისა და პრაქტიკაში ინტეგრირების მითითებით (დანართი #2);

გ) სამეცნიერო-კვლევით პროექტში ჩართულ პირთა შესახებ ინფორმაციას დოკუმენტებითურთ: კვლევით პროექტში ჩართულ პირთა CV, (სტუდენტის შემთხვევაში, ცნობა სტუდენტის სტატუსის, სწავლების სემესტრის და აკადემიური მოსწრების შესახებ); 

დ)   განათლების დამადასტურებელ დოკუმენტაციას;  

ე)   სამეცნიერო-კვლევითი საქმიანობის სრულყოფილად შესასრულებლად საჭირო აქტივობების დროში გაწერილ გეგმას (დანართი #3);

ვ)   თანხმობის წერილს უნივერსიტეტიდან მატერიალურ-ტექნიკური ბაზის გამოყენების თაობაზე (საჭიროების შემთხვევაში); 

ზ)     ინფორმაციას თანადაფინანსებაზე (არსებობის შემთხვევაში);

თ)    სამეცნიერო-კვლევითი პროექტის სავარაუდო ბიუჯეტს (დანართი #4).

📌საკონკურსო დოკუმენტების მიღების ვადის ამოწურვისთანავე საგრანტო განაცხადები გადაეცემა საკონკურსო კომისიას, რომელიც კონფიდენციალურობის პოლიტიკის გათვალისწინებით, განაცხადის წარმოდგენის ვადის გასვლიდან 1 თვის ვადაში შეაფასებს პროექტებს, მიიღებს გადაწყვეტილებას და გამოავლენს გამარჯვებულ პროექტებს;

📌კონკურსის შედეგები შესაბამისი ვადის ამოწურვის შემდეგ, გამოქვეყნდება IBSU-ს ვებგვერდზე;

📌საგრანტო პროექტის დაფინანსებისთვის მითითებული დოკუმენტაცია წარმოდგენილ უნდა იქნეს კვლევის ხელშეწყობის და პროექტების მართვის სამსახურში (ა ბლოკი, ა219)დალუქულ კონვერტში საკონკურსო დოკუმენტების წარდგენისთვის დადგენილ ვადაში (არასრულად წარმოდგენილი დოკუმენტაცია არ განიხილება) და გადმოგზავნილ იქნას მითითებულ ელ-ფოსტის მისამართზე: research@ibsu.edu.ge

📍განაცხადების მიღების პერიოდია 26 აგვისტოდან 26 სექტემბრის 18:00 საათამდე (პასუხი დაფინანსებაზე ცნობილი იქნება 25 ოქტომბერს)